കോഴിക്കോട്: നിരോധനത്തിന് പിന്നാലെ പോപുലർ ഫ്രണ്ട് ഓഫ് ഇന്ത്യ പിരിച്ചുവിട്ടതായി സംസ്ഥാന ജനറൽ സെക്രട്ടറി എ അബ്ദുൽ സത്താർ.
രാജ്യത്തിന്റെ നിയമം അനുസരിക്കുന്ന പൗരന്മാർ എന്ന നിലയിൽ, സംഘടന ആഭ്യന്തര മന്ത്രാലയത്തിന്റെ തീരുമാനം അംഗീകരിക്കുന്നതായും അബ്ദുൽ സത്താർ പ്രസ്താവനയിലൂടെ അറിയിച്ചു.
'പോപുലർ ഫ്രണ്ട് ഓഫ് ഇന്ത്യ പിരിച്ചുവിട്ടതായി അതിന്റെ എല്ലാ മുൻ അംഗങ്ങളെയും പൊതുജനങ്ങളെയും അറിയിക്കുന്നു. നിയമവിരുദ്ധമെന്ന വിജ്ഞാപനം പ്രസിദ്ധീകരിച്ചതു മുതൽ പോപുലർ ഫ്രണ്ട് ഓഫ് ഇന്ത്യയുടെ പ്രവർത്തനങ്ങൾ നിർത്താൻ എല്ലാ മുൻ അംഗങ്ങളോടും അഭ്യർഥിക്കുന്നു'- പ്രസ്താവനയിൽ വ്യക്തമാക്കുന്നു.
അതേസമയം, എൻഐഎ സംഘം അബ്ദുൽ സത്താറിനെ കസ്റ്റഡിയിലെടുത്തിട്ടുണ്ട്. കൊല്ലം കരുനാഗപ്പള്ളിയിലെ കാരുണ്യ സെന്ററിൽ വച്ചാണ് സത്താറിനെ കസ്റ്റഡിയിലെടുത്തത്.
സത്താറിന്റെ വീട്ടിലും ഇവിടെയുള്ള കാരുണ്യ സെന്ററിലും റിഹാബ് സെന്ററിലുമെല്ലാം രണ്ടു ദിവസം മുമ്പ് പൊലീസിന്റെ പരിശോധനയുണ്ടായിരുന്നു. എന്നാൽ ആ സമയങ്ങളിൽ അബ്ദുൽ സത്താർ സ്ഥലത്തില്ലായിരുന്നു.
തിരിച്ചെത്തിയ സത്താർ രാവിലെ മുതൽക്കെ കാരുണ്യ സെന്ററിലുണ്ടായിരുന്നു. ഉച്ചയ്ക്ക് മുൻപ് മാധ്യമങ്ങളെ കാണുകയും ചെയ്തിരുന്നു. തൊട്ടുപിന്നാലെയാണ് പൊലീസും കേന്ദ്ര ഏജൻസികളും ഇവിടെയെത്തി സത്താറിനെ കസ്റ്റഡിയിലെടുക്കുന്നത്.
ഇന്നു രാവിലെയാണ് പോപുലർ ഫ്രണ്ടിനെ നിരോധിച്ച് കേന്ദ്ര ആഭ്യന്തര മന്ത്രാലയം ഉത്തരവിറക്കിയത്. ഇതോടൊപ്പം കാംപസ് ഫ്രണ്ട്, വിമൻസ് ഫ്രണ്ട്, ഓൾ ഇന്ത്യ ഇമാംസ് കൗൺസിൽ അടക്കമുള്ള എട്ട് അനുബന്ധ സംഘടനകളേയും നിരോധിച്ചിട്ടുണ്ട്.
നിരോധനം കൊണ്ടായില്ല, ആര്‍.എസ്.എസിനെ മൂന്നു തവണ നിരോധിച്ചിട്ടുണ്ട്: യെച്ചൂരി
തിരുവനന്തപുരം: എല്ലാവിധ തീവ്രവാദ പ്രവർത്തനങ്ങളെയും സി.പി.എം എതിർക്കുന്നുവെന്ന് സി.പി.എം ജനറല്‍ സെക്രട്ടറി സീതാറാം യെച്ചൂരി. പോപ്പുലർ ഫ്രണ്ട് നടത്തുന്ന പ്രവർത്തനങ്ങൾ അവസാനിപ്പിക്കേണ്ടതാണ്. ആര്‍.എസ്.എസും ബി.ജെ.പിയും പറയുന്നത് കേരളം തീവ്രവാദത്തിന്‍റെ ഹോട്ട് സ്പോട്ട് ആണെന്നാണ്. ആര്‍.എസ്.എസിനെ മൂന്നു തവണ നിരോധിച്ചിട്ടുണ്ടെന്നും യെച്ചൂരി വ്യക്തമാക്കി.
തീവ്രവാദ പ്രവർത്തനം നടത്തുന്നത് ആരായാലും അവരെ രാഷ്ട്രീയപരമായി ഒറ്റപ്പെടുത്തണം. മതപരമായ വേർതിരിവ് ഉണ്ടാകാൻ പാടില്ല. അത്തരം രാഷ്ട്രീയ പ്രവർത്തനം അവസാനിപ്പിക്കണം. പി.എഫ്.ഐയെ നിരോധിച്ചതു കൊണ്ടായില്ല. ഇത്തരത്തിൽ നിരോധിക്കുന്നത് ഫലം ചെയ്യുമെന്ന് കരുതുന്നില്ല.സിമി എന്ന പേരിലുണ്ടായിരുന്നത് നേരത്തെ നിരോധിച്ചതാണ്. ബുൾഡോസർ പൊളിറ്റിക്സും അവസാനിപ്പിക്കണം. പി.എഫ്.എയെ നിരോധിക്കുമ്പോൾ എന്തുകൊണ്ട് ആർ.എസ്.എസിനെ നിരോധിക്കുന്നില്ല എന്നാണ് കേരളത്തിലെ നേതാക്കൾ ചോദിക്കുന്നതെന്നും യെച്ചൂരി പറഞ്ഞു.
