ബാബരി മസ്ജിദ് തകർത്ത കർസേവകനും പിന്നീട് ഇസ്‌ലാം സ്വീകരിക്കുകയും ചെയ്ത മുഹമ്മദ് ആമിര്‍ 2021 ജൂലൈ 23 ന് മരണപ്പെട്ടിരുന്നു നേരത്തെ ബൽബീർ സിങ് എന്നായിരുന്നു അദ്ധേഹത്തിന്റെ പേര് ഓൾഡ് സിറ്റിയിലെ ഹാഫിസ് ബാബ നഗറിലെ വാടക വീട്ടിൽ മരിച്ച നിലയിൽ കാണപ്പെടുകയായിരുന്നു. കാഞ്ചൻബാഗ് പൊലീസെത്തിയാണ് മൃതദേഹം പുറത്തെടുത്തത്.
നഗരത്തിലെ ബലാപൂർ റോഡിൽ പണിയുന്ന മസ്ജിദുൽ റഹീമിയ്യയുടെ നിർമാണ മേൽനോട്ടത്തിലായിരുന്നു ആമിര്‍. ബാബരിക്ക് പകരം നൂറ് പള്ളികൾ നിർമിക്കുക എന്നതായിരുന്നു 1993 ജൂൺ ഒന്നിന് ഇസ്‌ലാം സ്വീകരിച്ച ആമിറിന്റെ ലക്ഷ്യം.
1992 ഡിസംബർ ആറിന് ബാബരി മസ്ജിദ് തകർത്ത വേളയിൽ പള്ളിയുടെ താഴിക്കുടങ്ങളിലേക്ക് ഇരച്ചു കയറിയ ആദ്യ കർസേവകരിൽ ഒരാളായിരുന്നു അദ്ദേഹം. ഇതേക്കുറിച്ച് ആമിര്‍ മുംബൈ മിററിന് നൽകിയ അഭിമുഖത്തിൽ പറയുന്നത് ഇങ്ങനെ;
'ഡിസംബർ ആദ്യവാരത്തിൽ അയോധ്യയിലേക്ക് പുറപ്പെട്ട വേളയിൽ സുഹൃത്തുക്കൾ പറഞ്ഞത്, എന്തെങ്കിലും നേടാതെ തിരിച്ചുവരരുത് എന്നാണ്. ഡിസംബർ അഞ്ചിന്, ബഹളമയമായിരുന്നു അയോധ്യ. അയോധ്യയും ഫൈസാബാദും വി.എച്ച്.പിയുടെ ആൾക്കാരെ കൊണ്ട് നിറഞ്ഞിരുന്നു. ആയിരക്കണക്കിന് കർസേവകർക്കൊപ്പമായിരുന്നു താമസം. സിന്ധി ദൈവമായ ജുലേലാലിനെ ആരാധിച്ചിരുന്ന അദ്വാനി ഞങ്ങൾക്ക് പ്രധാനപ്പെട്ട ആളായിരുന്നില്ല. ഉമാഭാരതി നാടകരാജ്ഞി ആയിരുന്നു. ഉറ്റസുഹൃത്ത് യോഗേന്ദർ പാലായിരുന്നു എന്റെ കൂടെ. ഞങ്ങൾ എല്ലാം അക്ഷമരും'
പള്ളി തകർത്ത ദിനം അവിടെ നിറയെ ഉന്മാദമായിരുന്നു. മന്ദിർ യഹി ബനായേഗി (ഇവിടെ തന്നെ ക്ഷേത്രം നിർമിക്കും) എന്ന അട്ടഹാസങ്ങൾ കേട്ടു. 'അന്ന് ഞാനൊരു മൃഗത്തെ പോലെയായി. പള്ളി പൊളിക്കവെ ദൂരെ നിന്ന് ഞങ്ങൾക്കു നേരെ ഒരു ഹെലികോപ്ടർ വരുന്നത് കണ്ട് ഞാൻ പേടിച്ചു. താഴെ നിന്നുള്ള അലറി വിളികൾ എന്റെ ചെവിയിൽ ആർത്തലച്ചു. വീണ്ടും ധൈര്യം സംഭരിച്ച് പിക്കാസെടുത്ത് പള്ളിയുടെ മിനാരത്തിന് മുകളിലേക്ക് കയറി.'- അദ്ദേഹം പറഞ്ഞു.
ബാബരി തകർത്ത് നാട്ടിൽ തിരിച്ചെത്തിയ ബൽബീറിന് വീരോചിത വരവേൽപ്പാണ് ലഭിച്ചത്. അയോദ്ധ്യയിൽ നിന്ന് കൊണ്ടു വന്ന രണ്ട് ഇഷ്ടികകൾ പാനിപ്പത്തിലെ ശിവസേനാ ഓഫീസിൽ സൂക്ഷിച്ചു. എന്നാൽ വീട്ടിൽ മറ്റൊന്നായിരുന്നു സ്ഥിതി. 'ഒന്നുകിൽ നീ, അല്ലെങ്കിൽ ഞാൻ. വീട്ടിൽ നിന്നിറങ്ങണമെന്ന, ഗാന്ധിയൻ മൂല്യങ്ങളിൽ വിശ്വസിച്ചിരുന്ന കോൺഗ്രസ്സ് അനുഭാവിയായ അച്ഛന്റെ അന്ത്യശാസനം വന്നു. ഞാൻ വീടു വിട്ടിറങ്ങി. ഞാനെന്റെ ഭാര്യയെ നോക്കി. അവൾ അവിടെ നിന്നേയുള്ളൂ. ഇതോടെ വീട്ടിൽ നിന്ന് തനിച്ച് ഇറങ്ങിപ്പോന്നു'
മുസ്ലിംകളുടെ കൈയിൽ കിട്ടാത്ത ഒരു സ്ഥലത്ത് ബൽബീർ അഭയം അന്വേഷിച്ചു. ആളൊഴിഞ്ഞ കെട്ടിടങ്ങളിലും വയലുകളിലും രാപ്പാർത്തു. അങ്ങനെ മാസങ്ങൾ അലഞ്ഞു. അച്ഛൻ മരിച്ചു എന്നറിഞ്ഞതോടെ വീട്ടിലേക്ക് തിരിച്ചു വന്നു. എന്നാൽ വീട്ടുകാർക്ക് ആർക്കും ബൽബീറിനെ വേണ്ടായിരുന്നു. തന്റെ സംസ്‌കാരത്തിൽ രണ്ടാമത്തെ മകനെ പങ്കെടുപ്പിക്കരുത് എന്ന് അച്ഛൻ കുടുംബങ്ങളോട് പറഞ്ഞേൽപ്പിച്ചിരുന്നു.
അതിനിടെ അയോധ്യയിലേക്കുള്ള യാത്രയിൽ കൂടെയുണ്ടായിരുന്ന യോഗേന്ദ്രപാൽ ഇസ്‌ലാം സ്വീകരിച്ചു. ഇതിന് പിന്നാലെ ബൽബീർ മുസഫർനഗറിലെ മൗലാനാ കലീം സിദ്ദീഖിയെ പോയിക്കണ്ടു. ഇതേക്കുറിച്ച് ബൽബീർ പറയുന്നതിങ്ങനെ;
'മതം മാറാൻ ആഗ്രഹിച്ചിരുന്നോ എന്ന് നിശ്ചയമുണ്ടായിരുന്നില്ല. മൗലാനാ എന്റെ അപേക്ഷ സ്വീകരിച്ചു. ഒരു പള്ളി പൊളിക്കാൻ കൂട്ടുനിന്ന നിങ്ങൾക്ക് നിരവധി പള്ളികൾ നിർമിക്കാൻ സഹായിക്കാനാകും എന്നു പറഞ്ഞു. ഒരു ചെറിയ വാക്കു മാത്രമായിരുന്നു അത്. ഞാനിരുന്ന് കരയാൻ തുടങ്ങി. മദ്രസയിൽ കുറച്ചു മാസങ്ങൾ ചെലവഴിച്ച ശേഷമാണ് മുഹമ്മദ് ആമിര്‍ എന്ന പേരു സ്വീകരിച്ച് മുസ്ലിമായത്. അതോടെ എന്റെ ജീവിതം വീണ്ടും പാളത്തിൽ കയറി'
ബാബരി മസ്ജിദിന്റെ മിഹ്റാബിൽ നിന്നുള്ള ഒരു ചെറുമന്ത്രണം പോലും പള്ളിക്കുള്ളിൽ 200 അടി അകലെ നിന്നാലും വ്യക്തമായി കേൾക്കാനാവുമായിരുന്നു. ബാബരി മസ്ജിദിന്റെ നിർമ്മാണ ചാരുതിയെക്കുറിച്ച് ബ്രിട്ടീഷ് വാസ്തുവിദ്യാ വിദഗ്ധൻ ഗ്രേയം പിക്ഫോഡ് പറഞ്ഞതാണ് ഇക്കാര്യം. ആധുനിക വാസ്തുവിദ്യാ ശാസ്ത്രത്തെ ഇന്നും വിസ്മയിപ്പിക്കുന്ന നിരവധി സവിശേഷതകളുള്ള ആ മസ്ജിദിനെച്ചൊല്ലിയുയർന്ന ഒരു വിദ്വേഷമന്ത്രമാണ് ഇന്നും ആയിരക്കണക്കിന് കിലോമീറ്ററുകൾ അലയടിച്ച് ഇന്ത്യയുടെ വർത്തമാനകാലത്തെ നിർണ്ണയിച്ചുകൊണ്ടേയിരിക്കുന്നത്.
ഇന്ത്യൻ ഉപഭൂഖണ്ഡത്തിലെ ആദ്യ മുഗൾ ചക്രവർത്തി ബാബറിന്റെ സേനാ നായകനായിരുന്ന മീർ ബാഖി 1528 ലാണ് ബാബരി മസ്ജിദ് നിർമിച്ചത്. മസ്ജിദ് നിലകൊള്ളുന്നത് രാമജന്‍മഭൂമിലെ ക്ഷേത്രനിര്‍മിതിക്ക്മേലാണ് എന്ന വാദത്തെ അടിസ്ഥാനമാക്കി മസ്ജിദിനെതിരായ നടന്ന ആക്രമസംഭവം ആദ്യമായി രേഖപ്പെടുത്തപ്പെടുന്നത് 1853 ലാണ് . 1934 ൽ പള്ളി നിൽ‍ക്കുന്ന സ്ഥലത്തെച്ചൊല്ലി വീണ്ടും സംഘർഷമുണ്ടാവുകയും പള്ളിയുടെ മതിലും താഴികക്കുടവും തകർപ്പെടുകയും ചെയ്തു. ബ്രിട്ടീഷുകാർ ഇവ പുനർനിർമിച്ചു.
ബ്രിട്ടീഷുകാർ ഇന്ത്യ വിട്ട ശേഷമാണ് ബാബരിമസ്ജിദ് ഭൂമിയെക്കുറിച്ചുളള തർക്കത്തിലെ ഏറ്റവും സുപ്രധാനമായ വഴിത്തിരിവുണ്ടാകുന്നത്. 1949 ൽ ഹിന്ദുമഹാസഭാ അംഗങ്ങൾ ബാബരി മസ്ജിദിനുള്ളിൽ രാമവിഗ്രഹങ്ങൾ ഒളിപ്പിച്ചു കടത്തി. വിഷയം വീണ്ടും കോടതിയിലെത്തി. മസ്ജിദ് സ്ഥലം തർക്കഭൂമിയായി പ്രഖ്യാപിച്ച സർക്കാർ ഗേറ്റ് താഴിട്ട് പൂട്ടി. അതുവരെ സാമുദായികമായിരുന്ന രാമജൻമഭൂമി അവകാശവാദം 1984 ൽ രാഷ്ട്രീയ വിഷയമായി. സംഘപരിവാർ സംഘടനയായ വിഎച്പി മസ്ജിദ് ഭൂമിയിൽ ക്ഷേത്ര നിർമാണം നടത്തുമെന്ന് പ്രഖ്യാപിച്ചു. ബിജെപി നേതാവായ എൽ കെ അദ്വാനി പ്രക്ഷോഭത്തിന്റെ നേതാവായി. 1986 ൽ ജില്ലാ ജഡ്ജി മസ്ജിദിന്റെ താഴുകൾ ഹിന്ദു ആരാധനയ്ക്കായി തുറക്കാൻ ഉത്തരവിട്ടു. പ്രതിരോധത്തിനായി ബാബരി കർമസിമിതിയും രൂപീകരിക്കപ്പെട്ടു. 1989 ൽ പ്രധാനമന്ത്രി രാജീവ് ഗാന്ധി അനുമതി നൽകിയതിനെത്തുടർന്ന് മസ്ജിദ് പരിസരത്ത് വിഎച്പി ക്ഷേത്രത്തിന് തറക്കല്ലിട്ടു.
1990 ൽ വിഎച്പി പ്രവർത്തകർ പള്ളിയിലേക്ക് അതിക്രമിച്ചു കയറി മിനാരത്തിനുമുകളിൽ കൊടിനാട്ടി. അന്നത്തെ ഉത്തർപ്രദേശ് മുഖ്യമന്ത്രി മുലായം സിംഗ് യാദവ് ശക്തമായ നിലപാടെടുക്കുകയും പള്ളി സംരക്ഷിക്കപ്പെടുകയും ചെയ്തു. പക്ഷേ ഉത്തർപ്രദേശ് വർഗീയ സംഘർഷത്താൽ വിറകൊണ്ടു. 1991 ൽ ബിജെപി ഉത്തർപ്രദേശിൽ അധികാരത്തിൽ എത്തി. 1992 ഡിസംബർ 6ന് അദ്വാനി, മുരളി മനോഹർ ജോഷി, ഉമാഭാരതി തുടങ്ങിയവരുടെ നേത‌ത്വത്തിൽ സംഘപരിവാർ സംഘടനകളുടേയും ശിവസേനയുടെയും പ്രവർത്തകരടങ്ങുന്ന ലക്ഷക്കണക്കിന് കർസേവകർ ബാബറി മസ്ജിദ് തകർത്തു. കല്യാൺ സിംഗിന്റെ നേതൃത്തിലുള്ള യുപി ബിജെപി സർക്കാർ അക്രമം തടയാൻ കാര്യമായി ഒന്നും ചെയ്തില്ല. തുടർന്ന് രാജ്യവ്യാപകമായി കലാപങ്ങളും വംശഹത്യകളുമുണ്ടായി. ആയിരങ്ങൾ കൊല്ലപ്പെട്ടു.
